ગુજરાતમાં અમદાવાદના અંજલિ ચાર રસ્તા વિસ્તારમાં બનેલી એક ઘટનાનો વીડિયો સોશિયલ મીડિયા પર ભારે પ્રમાણમાં વાયરલ થયો છે. વીડિયોમાં એક ટ્રાફિક પોલીસકર્મી ઍક્ટિવા ચલાવતી મહિલાને થપ્પડ મારતા અને વધુ માર મારવાનો પ્રયાસ કરતા દેખાઈ રહ્યા છે. આ ઘટના બાદ પોલીસના વર્તન અંગે અનેક સવાલો ઊભા થયા છે.
આ ઘટના 19 ડિસેમ્બરના રોજ સાંજના સાડા છ વાગ્યે અંજલિ ચાર રસ્તા ખાતે બની હતી. ઘટનામાં ઍક્ટિવા ચલાવતી મહિલા બંસરી ઠક્કર અને અમદાવાદના એન ડિવિઝન ટ્રાફિક પોલીસ સ્ટેશનમાં ફરજ બજાવતા હેડ કૉન્સ્ટેબલ જયંતીભાઈ ઝાલા સામેલ હોવાનું જાણવા મળ્યું છે.
વીડિયો વાયરલ થતાં તાત્કાલિક કાર્યવાહી
વીડિયો વાયરલ થયા બાદ અમદાવાદ શહેર ટ્રાફિક પોલીસ દ્વારા હેડ કૉન્સ્ટેબલ જયંતીભાઈ ઝાલાને તાત્કાલિક ફરજમોકૂફ કરવામાં આવ્યા છે. સાથે જ, બંને પક્ષો તરફથી એકબીજા સામે ફરિયાદો નોંધવામાં આવી છે.
હેડ કૉન્સ્ટેબલ ઝાલાએ પોલીસની કામગીરીમાં અવરોધ કરવા બદલ બંસરી ઠક્કર સામે ફરિયાદ નોંધાવી છે. જ્યારે બીજી તરફ, 20 ડિસેમ્બરના રોજ બંસરી ઠક્કરની અરજીના આધારે હેડ કૉન્સ્ટેબલ વિરુદ્ધ પણ ફરિયાદ દાખલ કરવામાં આવી છે.
વાયરલ વીડિયોમાં શું જોવા મળે છે?
સોશિયલ મીડિયા પર સામે આવેલા વીડિયોમાં હેડ કૉન્સ્ટેબલ મહિલા પર ઉગ્ર વર્તન કરતા અને થપ્પડ મારતા દેખાય છે. ત્યારબાદ મહિલા પોતાના મોબાઇલમાં વીડિયો રેકોર્ડ કરતી અને પોલીસ કંટ્રોલ રૂમમાં ફોન કરીને ફરિયાદ કરતી નજરે પડે છે.
20 ડિસેમ્બરના રોજ ઘટનાનો વધુ એક વીડિયો સામે આવ્યો, જેમાં મહિલા અને પોલીસકર્મી વચ્ચે ઉગ્ર બોલાચાલી થતી જોવા મળે છે. આ વીડિયોમાં મહિલા પોલીસકર્મીને ગાળો આપતી હોવાનું પણ દેખાય છે.
આ ઉપરાંત, ઘટનાસ્થળે હાજર અન્ય પોલીસકર્મીના બોડીવોર્ન કેમેરામાં રેકોર્ડ થયેલો એક વીડિયો પણ સામે આવ્યો છે. તેમાં બંને વચ્ચે ઉગ્ર વાદવિવાદ, કાર્ડ નીચે પડવાની ઘટના અને ત્યારબાદ ઝપાઝપી જોવા મળે છે. આ વીડિયોમાં અન્ય પોલીસકર્મીઓ હેડ કૉન્સ્ટેબલને કાબૂમાં લેવા પ્રયાસ કરતા પણ નજરે પડે છે.
બંસરી ઠક્કરના આક્ષેપ
બંસરી ઠક્કરે બીબીસી ગુજરાતી સાથે વાત કરતાં જણાવ્યું હતું કે, ટ્રાફિક સિગ્નલ ક્રોસ કરતી વખતે પોલીસે તેમને રોકીને લાઇસન્સ માગ્યું હતું. તેમણે સાઇડમાં ઊભા રહીને લાઇસન્સ બતાવવાનું કહેતાં પોલીસકર્મી ઉશ્કેરાઈ ગયા અને ઉદ્ધતાઈભર્યું વર્તન કર્યું.
બંસરીનું કહેવું છે કે, પોલીસકર્મીએ પોતાનું આઈડી કાર્ડ બતાવ્યું હતું, પરંતુ તે પરત આપતી વખતે અચાનક નીચે પડી ગયું. ત્યારબાદ પોલીસકર્મીએ તેમને થપ્પડ મારી અને હાથ મરડ્યો હતો.
પોલીસને ગાળો આપવાના આરોપ અંગે તેમણે જણાવ્યું હતું કે, પોલીસ દ્વારા માર પડ્યા બાદ આક્રોશમાં તેમણે ગાળો બોલી હતી. તેમનું કહેવું છે કે, ભલે તેમણે ગેરવર્તન કર્યું હોય, પરંતુ કાયદો પોલીસને હાથ ઉગામવાની સત્તા આપતો નથી.
અગાઉના વીડિયોને લઈને સ્પષ્ટતા
સોશિયલ મીડિયા પર 14 નવેમ્બરના રોજનો એક જૂનો વીડિયો પણ વાયરલ થયો છે, જેમાં બંસરી ઠક્કર પર પોલીસ સાથે ગેરવર્તન કર્યાના આક્ષેપ છે. આ અંગે બંસરીએ જણાવ્યું કે, તે દિવસે તેમની સામે કોઈ મેમો કે કાર્યવાહી કરવામાં આવી નહોતી. જો તેઓ ખોટા હોત તો તે દિવસે જ કાર્યવાહી થવી જોઈતી હતી.
પોલીસ વિભાગનો જવાબ
અમદાવાદ શહેર ટ્રાફિક ડીસીપી ભાવના પટેલે પ્રેસ કોન્ફરન્સ કરીને જણાવ્યું હતું કે, મહિલા ટ્રાફિક સિગ્નલનો ભંગ કરી રહી હતી અને હેલ્મેટ ન પહેર્યા હોવાથી તેમને રોકવામાં આવ્યા હતા. પૂછપરછ દરમિયાન મહિલાએ પોલીસ સાથે ગેરવર્તન કર્યું અને આઈડી કાર્ડ નીચે ફેંક્યું હતું.
ડીસીપી ભાવના પટેલે સ્વીકાર્યું કે, પોલીસકર્મી ગુસ્સે થઈને મહિલાની સામે હાથ ઉગામ્યો, જે ખોટું છે. આ કારણે હેડ કૉન્સ્ટેબલને ફરજમોકૂફ કરવામાં આવ્યા છે. સાથે જ, મહિલાની સામે પણ ફરજમાં અવરોધ કરવા બદલ ફરિયાદ નોંધવામાં આવી છે.
તેમણે વધુમાં જણાવ્યું કે, હેડ કૉન્સ્ટેબલનો બોડીવોર્ન કેમેરા ચાલુ હતો કે નહીં તેની તપાસ ચાલી રહી છે.
મહિલાની ફરિયાદ પણ લેવામાં આવી
એન ડિવિઝન એસીપી એસ. એમ. પટેલે જણાવ્યું કે, મહિલાની ફરિયાદના આધારે હેડ કૉન્સ્ટેબલ સામે ભારતીય ન્યાય સંહિતાની કલમ 115(2) અને 351(2) હેઠળ ગુનો નોંધવામાં આવ્યો છે. મહિલાએ આંખના ભાગે ઈજા થવાનો આક્ષેપ કર્યો છે, જેના આધારે મેડિકલ સર્ટિફિકેટ મેળવી આગળની કાર્યવાહી હાથ ધરવામાં આવશે.
